شیعہ نیوز (پاکستانی شیعہ خبر رساں ادارہ) پاکستان میں انسانی حقوق کے لیے فعال شیعہ افراد کا لاپتہ ہونا ایک معمول بن گیا ہے جس پر ملک بھر سمیت بیرون ملک مقیم پاکستانی برادری میں بھی تشویش پائی جاتی ہے۔

امریکہ میں مقیم پاکستانی کمیونٹی نے انجینیئر ممتاز رضوی سمیت 75 لاپتہ شیعہ افراد سے متعلق اپنی تشویش کا اظہار کرتے ہوئے امریکہ میں تعینات پاکستانی سفارتکار کو ایک خط لکھا ہے جس میں لاپتہ شیعہ افراد کی بابت جواب طلب کیا گیا ہے۔

خط میں لکھا گیا ہے کہ انجینیئر ممتاز رضوی سمیت 75 شیعہ افراد کا لاپتہ ہونا سیکیورٹی اداروں کی جانب سے انسانی حقوق کی کھلی خلاف ورزی ہے، لوگوں کو لاپتہ کرنے کی یہ حالیہ لہر باعث تشویش اور شرمناک ہے۔

خط میں مطالبہ کیا گیا ہے کہ انجینیئر ممتاز رضوی (جو پانچ بچوں کے والد ہیں اور کاروبار کے سلسلے میں کوئٹہ سے کراچی واپسی پر خضدار کے مقام سے لاپتہ کردیے گئے) سمیت دیگر 75 سے زائد لاپتہ شیعہ افراد کو بازیاب کرایا جائے۔

واضح رہے کہ گزشتہ کئی مہینوں سے ملک بھر سے شیعہ افراد کی پر اسرار گمشدگی کا سلسلہ جاری ہے جس کے خلاف لاپتہ شیعہ افراد کے اہل خانہ مختلف مقامات پر احتجاج کرتے رہتے ہیں اور حکومت سمیت تمام مقتدر شخصیات سے اپنے پیاروں کی بازیابی کا مطالبہ کرتے ہیں۔

شیعہ نیوز (پاکستانی شیعہ خبر رساں ادارہ) مجلس وحدت مسلمین پاکستان گلگت بلتستان کے ڈپٹی سیکرٹری جنرل شیخ احمد علی نوری نے اپنے ایک تعزیتی بیان میں کہا ہے کہ عالم مبارز و مجاہد حجت السلام آغا علی رضوی کو انکی والدہ محترمہ اور میر واعظ نیورنگاہ آغا محمد علی شاہ کو انکی اہلیہ محترمہ کی وفات پر تعزیت و تسلیت پیش کرتے ہیں۔

انہوں نے اپنے بیان میں کہا کہ آغا علی رضوی کی والدہ محترمہ کی رحلت پر انکو اور تمام لواحقین کو تعزیت و تسلیت و پیش کرتے ہیں۔ والدہ محترمہ کی وفات سے آغا علی رضوی کی زندگی میں جو خلا پیدا ہوگیا ہے اسے پر کرنا ممکن نہیں۔ انہیں صبر و شکر کی تلقین کے ساتھ والدہ محترمہ کی مغفرت اور درجات کی بلندی کے لیے دعا گو ہیں۔ انہوں نے کہا کہ موت ایک اٹل حقیقت ہے اور ہر کسی نے اس کا مزہ چکھنا ہے۔ خدا اپنے بندوں کو مختلف امتحانات کے ذریعے سے آزماتا ہے اور وہی بندے کامیاب ہوتے ہیں جن کے ہاتھ سے صبر و شکر کا دامن نہیں چھوٹتا۔ ماں جیسی عظیم ہستی کی موت انتہائی سخت امتحان ہے، کیونکہ اس ہستی کی کمی کو کوئی بھی پورا نہیں کرسکتا۔ اللہ سے دعا ہے کہ اپنے نہ ختم ہونے والے خزانہ غیب سے لواحقین بلخصوص آغا علی رضوی کو اس نعمت کا نعم البدل عطا فرما اور مرحومہ کے درجات میں اضافہ فرما۔

شیعہ نیوز (پاکستانی شیعہ خبر رساں ادارہ) کرد ذرائع کا کہنا ہے کہ ترک فوج کی شام کے شمالی شہر عفرین میں داخل ہونے کی کوشش ناکام رہی ہے۔

ان ذرائع کے مطابق ترک فوج نے اپنے اتحادیوں کے تعاون سے فضائی حملے کرکے شام کے صوبے حلب میں داخل ہونے کی کوشش کی مگر وہ کامیاب نہ ہوسکی اور ڈیموکریٹک فورس نے ترکی اور اس کے اتحادیوں کے حملے کو پسپا کر دیا۔روس میں شامی کردوں کے نمائندے نے بھی کہا ہے کہ عفرین میں ہونے والی جھڑپوں میں ترکی کے دس اور مسلح مخالفین سے وابستہ بیس فوجی ہلاک ہوئے جن کی لاشوں کو سرحدی شہر اعزاز منتقل کر دیا گیا۔

واضح رہے کہ ترک فوج نے شام کے صوبے حلب کے شہر عفرین پر گولہ باری اور بمباری کی ہے۔ یہ ایسی حالت میں ہے کہ شام کی حکومت نے اپنے ملک کی سرزمین پر ترک فوجیوں کی موجودگی اور ان کی فوجی کارروائی کو ہمیشہ غیر قانونی قرار دیا ہے اور ترکی کے اس قسم کے اقدام پر ہمیشہ تنقید کی ہے۔

شیعہ نیوز (پاکستانی شیعہ خبر رساں ادارہ) یمنی فوج نے صوبہ تعز کے ایک علاقے میں سعودی اتحادی فوجیوں کے ٹھکانے پر قاہر دو بیلسٹک میزائل سے حملہ کیا ہے۔

المسیرہ ٹیلی ویژن چینل کے مطابق یمنی فوج نے یہ میزائل، تعز میں الخیام فوجی اڈے پر، جہاں سعودی عرب کے اتحادی فوجیوں کا ٹھکانہ ہے فائر کیا-

اس حملے میں سعودی عرب کے متعدد اتحادی فوجی ہلاک اور زخمی ہو گئے ہیں۔ اس سے چند روز پہلے بھی یمن کی عوامی انقلابی تحریک انصاراللہ کے میزائل یونٹ نے سعودی عرب کے سرحدی علاقے نجران میں سعودی فوج کے ایک اڈے پر میزائل فائر کیا تھا-

یمنی فوج اور عوامی رضاکار فورس نے پیر کو تعز میں ہی ایک اور کارروائی کر کے سعودی عرب کے متعدد فوجیوں کو ہلاک اور زخمی کر دیا-

ادھر جوف کے علاقے تپہ القناصین اور الغیل شہر میں بھی سعودی عرب اور اس کے اتحادی فوجیوں پر یمنی فوج نے حملہ کیا- اس درمیان سعودی جنگی طیاروں نے اپنی جارحیت کا سلسلہ جاری رکھتے ہوئے یمن کے ٹیلی ویژن چینل کی عمارت پر دوبارہ حملہ کیا-

سعودی جنگی طیاروں نے آٹھ دسمبر کو بھی یمن کے ٹی وی چینل کی عمارت پر حملہ کیا تھا جس میں پانچ افراد شہید اور متعدد دیگر زخمی ہو گئے تھے۔

شیعہ نیوز (پاکستانی شیعہ خبر رساں ادارہ) ڈی جی آئی ایس پی آر میجر جنرل آصف غفور نے کہا ہے کہ جمہوریت کے ثمرات عوام تک پہنچتے رہیں تو جمہوریت کو کوئی خطرہ نہیں۔

نجی ٹی وی کو دیے گئے ایک انٹرویو میں ان کا کہنا تھا کہ سینیٹ انتخابات الیکشن کمیشن نے کرانے ہیں، فوج کا اس میں کوئی کردار نہیں۔ ترجمان پاک فوج نے بلوچستان میں حکومت کی تبدیلی میں کردار پر وزراء کے بیانات کا جواب دینے سے انکار کرتے ہوئے کہا کہ ملک میں جو بھی تبدیلیاں ہوئیں سیاسی عمل کے ذریعے ہوئیں، آرمی چیف نے ہمیشہ کہا کہ وہ آئین پر یقین رکھتے ہیں۔ انہوں نے کہا کہ آئینی حدود میں انتخابات سے متعلق جو بھی احکامات ملیں گے ان پر عمل کریں گے۔ ان کا کہنا تھا کہ ایل او سی پر بھارتی کارروائی کا ایک مقصد مسئلہ کشمیر سے دنیا کی توجہ ہٹانا بھی ہے، کوئی مس ایڈونچر ہوگا تو اس کا جواب دیا جارہا ہے اور دیا جاتا رہے گا۔

میجر جنرل آصف غفور نے کہا کہ بھارت نے کئی بار سیز فائر معاہدے کی خلاف ورزیاں کیں، جارحیت کا مقصد دہشتگردی کیخلاف جنگ سے ہماری توجہ ہٹانا ہے۔ انہوں نے کہا کہ مقبوضہ کشمیر میں چلنے والی تحریک آزادی بھارت کے بس سے باہر ہورہی ہے۔ پاک فوج کے ترجمان نے کہا کہ ہم دہشتگردی کے خلاف جنگ لڑرہے ہیں، یہ کہنا غلط ہے کہ حقانی نیٹ ورک یا دیگر افغانستان جاکر حملے کررہے ہیں۔

شیعہ نیوز (پاکستانی شیعہ خبر رساں ادارہ) کراچی میں مدرسے کے استاد کے بہیمانہ تشدد سے اس کا 10 سالہ شاگرد جاں بحق ہوگیا۔ نجی ٹی وی کے مطابق کراچی کے علاقے بن قاسم کے عید گوٹھ میں مدرسے کے قاری نظام الدین نے گزشتہ روز اپنے شاگرد 10 سالہ محمد حسین کو بہیمانہ تشدد کا نشانہ بنایا اور لاٹھی سے مارا پیٹا جس سے بچہ شدید زخمی ہوگیا۔ قاری کے تشدد کے باعث بچے کی حالت تشویشناک ہوگئی جسے اسپتال منتقل کیا گیا لیکن وہ زخموں کی تاب نہ لاتے ہوئے دم توڑ گیا۔

بچے کے اہل خانہ نے قاری کو معاف کردیا اور اس کی لاش کا پوسٹ مارٹم کرانے سے بھی انکار کرکے اس کی تدفین کردی۔ پولیس نے واقعے کی اطلاع ملنے پر ملزم کو گرفتار کرکے اس کے خلاف سرکار کی مدعیت میں مقدمہ درج کرلیا جس میں تشدد اور قتل کی دفعات بھی شامل کی گئی ہیں۔ پولیس کا کہنا ہے کہ ملزم کو ریمانڈ کے لئے عدالت میں پیش کیا جائے گا اور اس سے مزید تفتیش کی جائے گی۔

شیعہ نیوز (پاکستانی شیعہ خبر رساں ادارہ) اصغریہ اسٹوڈنٹس آرگنائزیشن پاکستان کے مختلف ڈویژنز میں دو روزہ کربلا محور انسانیت اجلاس جاری ہیں، جبکہ کچھ ڈویژن اور اضلاع کے اجلاس 26، 27 جنوری کو ہونگے۔

تفیصلات کے مطابق اے ایس او دادو ڈویژن کا اجلاس خیرپورناتھن شاہ سٹی میں مرکزی جنرل سیکریٹری غلام سرور سومرو کی زیر صدارت منعقد ہوا، جس میں شعیہ علما کونسل کے سینئر نائب صدر علامہ محمد باقر نجفی، مبین مطہری، مرکزی جنرل سیکریٹری غلام سرور سومرو نے خطاب کیا، جبکہ حیدرآباد ڈویژن کا دو روزہ اجلاس مہران اسکلز ڈولمپنٹ سینٹر جامشورو میں مرکزی رہنماء عزادار حسین کی زیر صدارت منعقد ہوا، جس میں حبیب اللہ حسینی، ثابت علی ساجدی، منتظر مہدی نے خطاب کیا۔ اجلاس میں یونٹس، اضلاع اور ڈویژن کی کارکردگی رپورٹس پیش کی گئیں۔

اجلاس کا اہم ایجنڈا سرپرست کونسل کے نمائندے کی موجودگی میں آنے والے سال کیلئے پہلے مرحلے کی ووٹنگ کروائی گئی، جس میں ڈویژن جنرل کونسل کے تمام ممبران نے نئے مرکزی صدر کیلئے 2 نام دیئے۔ مرکزی صدر کے انتخاب کے دو مرحلے ہوتے ہیں، پہلے مرحلے میں جنرل کونسل میں سے دو نام لئے جاتے ہیں، جبکہ ووٹنگ کا دوسرا اور آخری مرحلہ مرکزی کنونشن میں ہوتا ہے، جس میں اکثریت رائے سے آنے والے دو ناموں میں سے ایک نام کے انتخاب کیلئے ووٹنگ کروائی جاتی ہے، اور اکثریت رائے سے آنے والے مرکزی صدر کے نام کا اعلان جلسہ عام یوم زہرا (س) میں کیا جاتا ہے۔

شیعہ نیوز (پاکستانی شیعہ خبر رساں ادارہ) افغان مہاجرین کی وطن واپسی کی ڈیڈلائن میں 8 دن رہنے کے بعد افغان حکومت نے مزیدتوسیع کیلیے وفاقی حکومت سے رابطہ کر لیا ہے۔

19 لاکھ افغان مہاجرین کی وطن واپسی کی ڈیڈلائن میں 8 دن رہنے کے بعد افغان حکومت نے مزید توسیع کیلئے وفاقی حکومت سے رابطہ کرلیا ہے، جس پر وزارت سیفران نے آج 23 جنوری کو اجلاس طلب کرلیا ہے۔ وفاقی حکومت کی جانب سے رجسٹرڈ اور غیر رجسٹرڈ افغان مہاجرین کی وطن واپسی کی ڈیڈ لائن 30 جنوری تک کی ہے جبکہ غیر رجسٹرڈ افغان مہاجرین کی رجسٹریشن بھی 30 جنوری تک ہے جس کے بعد غیر رجسٹرڈ افغان مہاجرین کے خلاف گرینڈ آپریشن کیاجائیگا۔

واضح رہے کہ رجسٹرڈ افغان مہاجرین کی رضا کارانہ واپسی موسم سرما کے باعث عارضی طور پر بند ہے۔

شیعہ نیوز (پاکستانی شیعہ خبر رساں ادارہ) ملا صوفی محمد نے جیل کی ہوا کیا کھائی خود ساختہ شریعت بھی تبدیل ہو گئی۔ علامہ اقبال نے ایسے ہی ملاوں کیلئے کہا تھا کہ ’’خود بدلتے نہیں' قرآن کو بدل دیتے ہیں‘‘۔ گرفتاری سے قبل صوفی محمد نے سوات میں نام نہاد شریعت نافذ کی تھی اور پاکستان کے آئین اور قانون کو کفر قرار دیا تھا، لیکن اب رہائی پانے کے بعد اب اس نے اپنا سارا موقف ہی بدل لیا ہے۔

صوفی محمد کا کہنا ہے کہ پاک فوج کے خلاف لڑنا حرام ہے اگر پاک فوج نہ ہوتی تو ملک تقسیم ہوچکا ہوتا۔ نجی ٹی وی کے پروگرام میں دیے گئے خصوصی انٹرویو میں صوفی محمد نے کہا کہ کلمہ گو مسلمان کو قتل کرنا حرام اور ریاست کے خلاف ہتھیار اٹھانا خلاف شریعت ہے، خواتین اور بچوں کو مارنا حرام ہے خواہ وہ کافر ہی کیوں نہ ہوں جبکہ آرمی پبلک اسکول میں بچوں کو شہید کرنے والے کافر سے بھی بدتر ہیں۔

کالعدم تحریک نفاذ شریعت محمدی کے سربراہ نے کہا کہ ملا فضل اللہ نے طالبان سے رابطہ کیا اور ان کے ساتھ شامل ہوگیا میں نے وصیت نامہ لکھوایا کہ یہ لوگ خوارج سے بھی بدتر ہیں، فضل اللہ نے غیر مسلموں سے بھی زیادہ اسلام کو نقصان پہنچایا، میرے ساتھ سب سے زیادہ دشمنی فضل اللہ نے کی کیونکہ فضل اللہ اور اس کے ساتھیوں نے میری تحریک ختم کی، فضل اللہ کی سزا صرف اور صرف موت ہے۔

ملا صوفی محمد نے کہا کہ ملالہ پرجب حملہ ہواتو وہ اس وقت جیل میں تھے تاہم یہ حملہ نہیں ہونا چاہیے تھا میں بچیوں کی تعلیم کے خلاف نہیں ہوں اور تعلیمی اداروں پر حملوں کو حرام سمجھتا ہوں ،علم حاصل کرنا ہر مرد اور عورت پر فرض ہے۔

شیعہ نیوز (پاکستانی شیعہ خبر رساں ادارہ) تحریک اسلامی نائجیریا کے سربراہ و شیعیان نائیجیریا کے قائد شیخ ابراہیم زکزاکی دوسال بعد پہلی مرتبہ منظر عام پر آئے۔ نیوز رپورٹس کے مطابق شیخ ابراہیم زکزاکی کو زخمی حالت میں گرفتار کرنے کے بعد پہلی دفعہ اجازت دی گئی ہے کہ وہ منظر عام پر آئیں اور اخباری نمائندوں سے بات کریں۔ 2015ء میں نائجیریا کی فورسز نے اس ملک کے شہر زاریا میں واقع امام بارگاہ پر اس وقت حملہ کردیا تھا جب وہاں دینی پروگرام چل رہا تھا۔ اس فوجی کاروائی میں شیخ کے بیٹے سمیت 1000 کے قریب بے گناہ افراد شہید کردیئے گئے تھے اور شیخ ابراہیم اور ان کی زوجہ کو زخمی حالت میں گرفتار کر لیا گیا تھا۔

شیخ ابراہیم زکزاکی ایسی حالت میں میڈیا کے ساتھ گفتگو کیلئے ظاہر ہوئے ہیں جب عوام کے اندر شیخ کی زندگی کے بارے میں شدید خدشات پائے جارہے تھے۔ گذشتہ دنوں نائجیریا میں ہونے والے مظاہرے پر پولیس کی جانب سے شیلنگ بھی کی گئی تھی۔