تازہ ترین

شیعہ نیوز (پاکستانی شیعہ خبر رساں ادارہ) جیل بھرو تحریک کے دوسرے مرحلے کا آغاز ہوگیا مجاہد عالم دین علامہ احمد اقبال رضوی نے گرفتاری دے دی۔

شیعہ لاپتہ افراد کی بازیابی کے لیے جیل بھرو تحریک دوسرے مرحلے میں داخل ہوگئی، علامہ احمد اقبال رضوی نے گرفتاری دےدی، ہزاروں مومنین گرفتاری دینے کے لیے تیار،فضائوں میں لبیک یا حسینؑ کی گونج۔

شیعہ نیوز (پاکستانی شیعہ خبر رساں ادارہ) مجلس وحدت مسلمین سندھ کے سیکریٹری جنرل علامہ مقصود علی ڈومکی نے کہا ہے کہ کراچی میں مجاہد عالم دین علامہ حسن ظفر نقوی کو ملت جعفریہ کے لاپتہ افراد کی بازیابی کی خاطر احتجاجاً گرفتاری پیش کرنے پر خراج تحسین پیش کرتے ہیں، علامہ حسن ظفر نقوی کا یہ اقدام ملت کے مظلوم طبقے کیساتھ ہمدردی اور حقیقی درد و اخلاص کی علامت ہے۔

ایم ڈبلیو ایم سندھ کی کابینہ اجلاس سے خطاب کرتے ہوئے علامہ مقصود ڈومکی نے کہا کہ ملت تشیع کے سینکڑوں لاپتہ افراد کی عدم بازیابی سے ان کے اہل خانہ شدید اضطراب کا شکار ہیں، جبری طور اغواء کرکے لاپتہ کرنا اور اہل خانہ کو ان لاپتہ افراد کے متعلق کوئی معلومات نہ دینا عدل و انصاف کے منافی اقدام ہے اور انسانی حقوق کی سنگین خلاف ورزی ہے۔ انہوں نے کہا کہ بعض اداروں کے اہلکار اپنے اختیارات کا ناجائز استعمال کر رہے ہیں، اگر اغواء کئے گئے شیعہ افراد سے کوئی جرم سرزد ہوا ہے، تو عدالتوں میں پیش کیا جائے۔

علامہ مقصود ڈومکی نے کہا کہ ایک عرصے سے ملک میں لاقانونیت کا راج ہے اور حکومتوں کو صرف اپنے اقتدار کو طول دینے کے علاوہ مظلوم کی داد رسی سے کوئی سروکار نہیں، ایک بزرگ عالم دین کا گمشدہ افراد کی بازیابی کیلئے خود کو گرفتاری کیلئے پیش کرنے کا عمل حکومت کی بدترین کارکردگی ثبوت ہے، ملت تشیع کے بے گناہ لاپتہ افراد کو بازیاب نہ کرایا گیا، تو اس احتجاجی تحریک کو پورے ملک میں پھیلا دیا جائیگا۔ انہوں نے کہا کہ مجاہد عالم دین علامہ حسن ظفر نقوی میدان عمل کے سپاہی ہیں، ملت جعفریہ کے لاپتہ افراد کی بازیابی کیلئے شروع کیجانے والی تحریک کی مکمل حمایت کرتے ہیں اور یہ تحریک اس وقت تک جاری رہے گی، جب تک لاپتہ شیعہ افراد کو بازیاب نہیں کرایا جاتا۔ علامہ مقصود ڈومکی نے مقتدر حلقوں سے مطالبہ کیا کہ وہ اس ظلم و ناانصافی کا فوری ازالہ کریں اور لاپتہ نوجوانوں کی بازیابی کو یقینی بنا کر انکے اہل خانہ کو ذہنی کرب و اذیت سے نجات دلانے میں اپنا کردار ادا کریں۔

شیعہ نیوز (پاکستانی شیعہ خبر رساں ادارہ) مجلس وحدت مسلمین پنجاب کے سیکرٹری جنرل علامہ مبارک علی موسوی نے کہا ہے کہ ملت تشیع کے لاپتہ افراد اگر مجرم ہیں تو عدالتوں میں پیش کیا جائے، ہم کسی جرائم پیشہ فرد کا دفاع نہیں کرینگے، پڑھے لکھے نوجوانوں کو محض بیلنس پالیسی کی آڑ میں اُٹھا لینا کہاں کا انصاف ہے، ہم حکومت وقت اور تمام قانون نافذ کرنیوالے اداروں کو چیلیج کرتے ہیں کہ وہ ایک فرد ایسا دکھا دیں جس نے ملکی سلامتی کے اداروں، افواج پاکستان، پولیس اور کسی سرکاری تنصیب میں خدانخواستہ کسی حملے یا اس کی منصوبہ بندی میں شریک رہا ہو۔

انہوں نے کہا کہ ظالم اور مظلوم کو ایک ہی لاٹھی سے ہانکنا یہ کہاں کا انصاف ہے؟ ہم لاپتہ افراد کے اہلخانہ کے مطالبات کی مکمل حمایت کرتے ہیں، لاپتہ افراد کے لواحقین آئینی قانونی جدوجہد کر رہے ہیں اور ان مظلوموں کا ساتھ دینا ہر پاکستانی پر فرض ہے۔ علامہ مبارک موسوی نے کہا کہ ایک طرف ہمیں شناخت کرکے قتل کیا جا رہا ہے، دوسری طرف ہمارے بے گناہ افراد غائب ہو رہے ہیں، آخر ہم انصاف لینے کہاں جائیں، ہم حکومت وقت اور مقتدر قوتوں سے مطالبہ کرتے ہیں کہ خدارا مظلوموں پر مزید ظلم کرنا بند کر دیں اور بے گناہ گمشدہ افراد کو فوری بازیاب کیا جائے، ہمیں سٹرکوں چوراہوں پر نکلنے پر مجبور نہ کیا جائے، بیگناہ افراد کی گمشدگی پر احتجاج ہمارا آئینی قانونی حق ہے، اس سے ہمیں کوئی بھی نہیں روک سکتا۔

شیعہ نیوز (پاکستانی شیعہ خبر رساں ادارہ) مجلس وحدت مسلمین پاکستان کے مرکزی سیکرٹری جنرل علامہ راجہ ناصر عباس جعفری نے مطالبہ کیا ہے کہ ملت تشیع کے لاپتہ بے گناہ نوجوانوں اور علماء کو فوری طور پر بازیاب کرایا جائے۔ ایم ڈبلیو ایم کے سربراہ نے اپنے بیان میں کہا ہے کہ نوجوانوں کی جبری گمشدگی اہل خانہ کے لئے اذیت کا باعث بنی ہوئی ہے۔

انہوں نے کہا کہ ملک کے مختلف حصوں سے تعلق رکھنے والے ملت کے پڑھے لکھے نوجوانوں کو ان کے گھروں سے اغوا کیا گیا، جن کی تاحال کوئی اطلاع نہیں، کئی سال گزرنے کے بعد بھی بیشتر نوجوانوں کو نہ تو عدالتوں کے سامنے پیش کیا جا رہا ہے اور نہ ہی ان کے اہل خانہ کو ان کی خیریت سے آگاہ کیا جا رہا ہے، یہ اقدام بنیادی انسانی حقوق کے منافی اور آئین پاکستان سے روگردانی ہے۔

انکا کہنا تھا کہ ملت تشیع کے نوجوانوں نے ہمیشہ حب الوطنی کا مظاہرہ کیا اور قانون و آئین کی پاسداری کی ہے، اگر کوئی نوجوان کسی جرم میں ملوث ہے تو اسے عدالت میں باضابطہ طور پر پیش کیا جانا چاہیے، سزا و انصاف کا فیصلہ کرنا عدلیہ کا کام ہے، ملک کے کسی بھی ادارے کو یہ حق حاصل نہیں کہ وہ عدالت کے سامنے پیش کئے بغیر کسی بھی شہری کو اس طرح حراست میں رکھے۔ انہوں نے کہا کہ گمشدہ افراد کی بازیابی کے مطالبے کو گذشتہ کئی سالوں سے دہرا یا جا رہا ہے، پانچ کروڑ سے زائد افراد پر مشتمل ملت تشیع کے مسائل سے دانستہ غفلت حکومت کی سیاسی ساکھ کے لئے بھی سخت نقصان دہ ثابت ہوگی، دہشت گردی کے ساتھ ہمیں ریاستی جبر کا شکار نہ بنایا جائے۔ انہوں نے وزیراعظم شاہد خاقان عباسی، وفاقی وزیر داخلہ احسن اقبال اور چیف جسٹس سپریم کورٹ آف پاکستان سے مطالبہ کیا ہے کہ انسانی حقوق کی اس پامالی کا فوری نوٹس لیا جائے اور ملت کے جبری گمشدہ نوجوانوں کی فوری بازیابی کے احکامات صادر کئے جائیں۔

شیعہ نیوز (پاکستانی شیعہ خبر رساں ادارہ) معروف شیعہ عالم دین، خطیب ولایت علامہ احمد اقبال رضوی نے مسجد و امام بارگاہ باب الحوائج جعفر طیار میں عشرہ محرم کی مجالس عزا سے خطاب کرتے ہوئے کہا ہے کہ پاکستان میں شیعہ و سنی مل کر تکفیریت کی جڑوں کو اکھاڑ پھنکیں گے، نیشنل ایکشن پلان کے نام پر محب وطن اہل تشیع عوام کو ہراساں کرنے کا راستہ روکیں گے، عزاداری امام حسین ہماری شہ رگ حیات ہے اس پر کوئی پابندی قبول نہیں۔

ایم ڈبلیو ایم کے رہنما علامہ احمد اقبال رضوی کا کہنا تھا کہ ہمارا اصلی دشمن عالمی استکبار ہے اور اس کے ایجنٹ پاکستان کی سلامتی کے دشمن ہیں، امت مسلمہ کے اتحاد کے دشمن ہیں، عالمی استکبار نے لبرل ڈیموکریسی کے نظام کے ذریعے دنیا کو اپنے شکنجے میں جکڑ رکھا ہے، پاکستان میں دہشت گردی کے خاتمہ کیلئے نیشنل ایکشن پلان کے اصل اہداف پر عمل کرنا ہوگا۔

علامہ احمد اقبال رضوی کا کہنا تھا کہ افسوس کے ساتھ کہنا پڑتا ہے کہ نیشنل ایکشن پلان کا رخ ملت جعفریہ کی جانب موڑ دیا گیا ہے، کراچی سمیت پنجاب بھر سے ہمارے بے گناہ افراد کو اغوا کیا جا رہا ہے، ہم اس کی بھرپور مذمت کرتے ہیں اور نیشنل ایکشن پلان کے نام پر محب وطن اہل تشیع عوام کو ہراساں کرنے کا راستہ روکیں گے، عزاداری امام حسین ہماری شہ رگ حیات ہے اس پر کوئی پابندی قبول نہیں۔ انہوں نے کہا کہ سی پیک منصوبہ پاکستان میں اقتصادی و معاشی ترقی کے راستہ کھول دے گا۔

شیعہ نیوز (پاکستانی شیعہ خبر رساں ادارہ) مجلس وحدت مسلمین کے زیراہتمام محرم الحرام سے قبل مذہبی، سیاسی اور سماجی شخصیات سے ملاقاتوں کا سلسلہ جاری ہے، مجلس وحدت مسلمین کے وفد نے صوبائی سیکرٹری جنرل علامہ اقتدار حسین نقوی کی قیادت میں جماعت اسلامی ملتان کے امیر میاں آصف محمود اخوانی سے ملاقات کی، اس موقع پر پر ایم ڈبلیو ایم کے ڈپٹی سیکرٹری جنرل سلیم عباس صدیقی، صوبائی ترجمان ثقلین نقوی اور ملک عامر کھوکھر اور جماعت اسلامی کی جانب سے ضلعی جنرل سیکرٹری صہیب عمار، الخدمت فائونڈینشن کے ضلعی امیر ڈاکٹر صفدر ہاشمی اور دیگر رہنما موجود تھے۔

ملاقات میں دونوں جماعتوں کے رہنمائوں نے محرم الحرام میں امن واستحکام کے لیے مشترکہ کوششوں کے حوالے سے تبادلہ خیال کیا، ایم ڈبلیو ایم کے رہنما علامہ اقتدار نقوی نے کہا کہ محرم الحرام میں برادران اہلسنت کی جانب سے تعاون قابل تحسین ہے، محرم الحرام میں اہلسنت برادران کو سبیلیں لگانے اور تعاون پر خراج تحسین پیش کرتے ہیں، انتظامیہ عزاداروں کے مسائل فوری حل کرے، عزاداروں کو ہراساں کیے جانے کا عمل ختم ہونا چاہیے، ملتان میں اتحاد و وحدت کے حوالے سے تمام معتدل مذہبی جماعتوں کو ساتھ لے کر چلیں گے۔

اس موقع پر جماعت اسلامی کے ضلعی امیر میاں آصف محمود اخوانی نے کہا کہ جماعت اسلامی عالم اسلام کی بہتری اور ملکی سلامتی کے لیے ہر وقت کوشاں ہے، ملتان میں تمام جماعتوں کے اتحاد سے دشمن کی سازشوں کو ناکام بنائیں گے، محرم الحرام میں مذہبی ہم آہنگی اور بھائی چارے کے حوالے سے مجلس وحدت مسلمین کی کوششیں لائق تحسین ہیں۔ علامہ اقتدار حسین نقوی نے ایم ڈبلیو ایم کے زیراہتمام منعقدہ ’’امام حسین محسن انسانیت سیمینار‘‘ کی دعوت دی جسے جماعت اسلامی کے ضلعی امیر نے قبول کیا۔

شیعہ نیوز (پاکستانی شیعہ خبر رساں ادارہ) پاکستان تحریک انصاف کے مرکزی وفد نے عمران خان کی قیادت میں مجلس وحدت مسلمین کے وفد سے ایم ڈبلیو ایم کے صوبائی سیکرٹیریٹ شادمان لاہور میں ملاقات کی۔ ملاقات میں این اے 120 میں ہونیوالے ضمنی الیکشن سے متعلق باہمی امور پر بات چیت کی گئی۔

ایم ڈبلیو ایم کے وفد نے ڈپٹی سیکرٹری جنرل احمد اقبال رضوی کی قیادت میں این اے 120 کے ضمنی الیکشن میں پاکستان تحریک انصاف کا بھرپور ساتھ دینے کا اعلان کیا۔ ملاقات میں این اے 120 کی امیدوار یاسمین راشد، شفقت محمود، علیم خان، عندلیب عباس، سید ناصر شیرازی، علامہ مبارک علی موسوی، سید اسد عباس نقوی اور دیگر رہنما شریک تھے۔ ملاقات کے بعد دونوں سیاسی جماعتوں کے رہنماؤں نے مشترکہ پریس کانفرنس کی، جس میں آغا احمد اقبال رضوی نے این اے 120 کے ضمنی الیکشن میں پی ٹی آئی کی امیدوار ڈاکٹر یاسمین راشد کی بھرپور حمایت کا اعلا ن کیا۔

آغا احمد اقبال رضوی نے کہا کہ پاکستان تحریک انصاف نے کرپشن کیخلاف بہت زیادہ جدوجہد کی ہے جو کہ قابل تعریف ہے اور ایم ڈبلیو ایم اس الیکشن کیمپین میں ڈاکٹر یاسمین راشد اور پی ٹی آئی کی بھرپور حمایت کا اعلان کرتی ہے۔ پریس کانفرنس میں پی ٹی آئی کے چئیرمین عمران خان نے مجلس وحدت مسلمین کے فیصلے کو سراہتے ہوئے کہا کہ ہم مجلس وحدت مسلمین کے انتہائی مشکور ہیں اور امید کرتے ہیں کہ آئندہ قومی امور پر بھی باہمی تعاون کیساتھ مل جل کر کام کریں گے۔

شیعہ نیوز (پاکستانی شیعہ خبر رساں ادارہ) مجلس وحدت مسلمین پاکستان کے مرکزی ڈپٹی سیکریٹری جنرل علامہ حسن ظفر نقوی نے کہا ہے کہ حکمران امریکہ سے خوفزدہ ہوسکتے ہیں مگر پاکستانی قوم نہیں، گذشتہ دنوں نمائش چورنگی پر امامیہ اسٹوڈنٹس آرگنائزیشن کی پر امن احتجاجی ریلی پر سندھ پولیس اور حکومتی ذمہ داران نے جو تشدد کیا وہ قابل مذمت ہے۔

ایک بیان میں ان کا کہنا تھا کہ ہمارے نوجوانوں کا قصور اور جرم یہ تھا کہ وہ شیطان بزرگ امریکہ کے خلاف احتجاج کر رہے تھے اور اس بات کا عہد بھی کیا جا رہا تھا کہ پاکستانی مفادات پر ہم سب کی جان قربان ہے جس پر انہیں درندگی کا نشانہ بنایا گیا، لیکن ہمارے نوجوانوں کو یہ پیغام دیدیا کہ وہ امریکہ سے خوفزدہ نہیں اور ذلت و رسوائی امریکہ کی قسمت میں لکھی ہوئی ہے۔ انہوں نے مطالبہ کیا کہ اس واقعہ کے ذمہ داران کو سزا دی جائے اور آئندہ ایسے واقعات کا سدباب کیا جائے۔

شیعہ نیوز (پاکستانی شیعہ خبر رساں ادارہ) مجلس وحدت مسلمین پاکستان کے سیکرٹری سیاسیات و رکن شوریٰ عالی سید اسد عباس نقوی نے لاہور میں سیاسی کونسل کے اجلاس سے خطاب کرتے ہوئے کہا کہ ملکی سلامتی کا تقاضا ہے کہ امریکن بلاک کو ہمیشہ کے لئے خیر باد کہہ دیا جائے، امریکہ نے 70 ہزار پاکستانی شہداء کی قربانیوں اور 20 کروڑ عوام کی توہین کی ہے، وقت آگیا ہے انسانیت دشمن امریکہ کو منہ توڑ جواب دیا جائے، امریکہ اور انڈیا پاکستان کی اقتصادی راہداری کے دشمن ہیں، امریکی دھمکی پر 34 ملکی اتحاد کی خاموش لمحہ فکریہ ہے، ن لیگی حکومت قوم کو بتائے راحیل شریف کی سربراہی میں بننے والے اتحاد نے اس مشکل گھڑی میں پاکستان کو نظر انداز کیوں کیا؟

انہوں نے کہاکہ اللہ نے وقت سے پہلے اس 34 ملکی اتحاد کو عوام کے سامنے بے نقاب کیا، اب بھی وقت ہے کہ مشرق وسطیٰ کے پراکسی وار سے پاکستان کو دور رکھا جائے۔ انہوں نے کہا کہ نوازشریف کی جانب سے مسلسل اداروں کیخلاف ہرزہ سرائی ناقابل برداشت ہے، ن لیگ کو ملکی سلامتی نہیں آل شریف کی سلامتی عزیز ہے، ن لیگ کبھی بھی الیکشن سے اقتدار میں نہیں آئی، انہیں ہمیشہ سے ایک سازش کے تحت قوم پر مسلط کیا گیا، 62,63 کو نکال کر آئین پاکستان کو مسخ کرنے نہیں دینگے، ہمیں صادق اور امین حکمران چاہیئے چور لٹیروں کے دن گنے جا چکے ہیں۔

انہوں نے کہا کہ مردم شماری کے ابتدائی رپورٹ میں گلگت بلتستان کی آبادی کو شامل نہ کرکے اکنامک کوریڈور کے گیٹ وے پر بسنے والوں کو کیا پیغام دیا جا رہا ہے؟ گلگت بلتستان کے محب وطن عوام کو نظر انداز کرنے کی پالیسی کو ترک کریں، یہ دنیا کا واحد خطہ ہے جہاں لوگ 70 سال سے پاکستان سے الحاق کی جدو جہد میں مصروف ہیں۔

شیعہ نیوز (پاکستانی شیعہ خبر رساں ادارہ) مجلس وحدت مسلمین ضلع مٹیاری کے ذمہ دار محمد خان کو چند روز قبل پیپلز پارٹی کے وڈیرے رئیس احمد علی نظامانی نے انتہائی ظالمانہ طریقے سے قتل کردیا۔

تفصیلات کے مطابق پیپلز پارٹی کے با اثر وڈیرے رئیس احمد علی نظامانی نے چند روز قبل ضلع مٹیاری میں مجلس وحدت مسلمین کے کارکن محمد خان کو انتہائی ظالمانہ طریقے سے قتل کردیا۔ظالم وڈیرے نے مقتول کے پا ئوں کاٹ کر مختلف علاقوں میں گھسیٹاجس کے بعد وہ زیادہ خون بہہ جانے کی وجہ سے جاں بر نہ ہوسکا۔

واقعے کے خلاف مئوثر اقدامات کرنے کے بجائے ایم ڈبلیو ایم ضلع مٹیاری کے ذمہ داران نے چپ سادھ لی ہے اور قاتل وڈیرے کے خلاف اقدام کرنے والے افراد کو بھی باز رہنے کی ہدایت کی جارہی ہے۔ مقتول کے لواحقین کا مجلس وحدت کی صوبائی قیادت سے مطالبہ ہے کہ با اثر وڈیرے کے خلاف قانونی چارہ جوئی کی جائے اور مجلس کے علاقائی ذمہ داران کے خلاف تادیبی کاروائی عمل میں لائی جائے۔